Марказий Африка Республикасида президентлик сайловларининг иккинчи босқичи ва парламент сайловлари якунланди. Мамлакатда уч йилдан бери давом этаётган мусулмон ва насроний жамоалар ўртасидаги тўқнашувларга чек қўйишга қаратилган мазкур сиёсий жараёнлар чоғида нохуш ҳодисалар қайд этилмади. Бу ҳақда «ТАСС» хабар бермоқда.
БМТнинг 11 минг нафар тинчликпарвар кучлари вакиллари ва 900 нафар француз ҳарбийси тартибни таъминлашга кўмак берди. Салкам 5 миллион аҳолиси бор мамлакатда 2 миллионга яқин сайловчи рўйхатдан ўтди. Овоз беришларнинг дастлабки натижалари бир, якуний натижалар эса уч ҳафтадан сўнг эълон қилиниши кутилмоқда.
Президентлик сайловининг иккинчи босқичида МАРнинг икки собиқ бош вазири — биринчи турда 23,74 % овоз олган Анисе Жорж Дологеле ва Фостен Аршанж Туадера (19,05%) иштирок этди.
Изоҳ (0)