Америкалик ҳарбийлар Алеппо устида ҳеч қандай парвозларни амалга оширмади, шаҳар бўйлаб зарбалар ҳам бергани йўқ. АҚШ вакиллари РФ Мудофаа вазирлигининг баёнотига шу тариқа жавоб берди, деб хабар қилади «ТАСС».
«Россиялик расмий шахсларнинг Алеппога америкаликлар зарба бергани ҳақидаги баёноти ёлғондан иборат», — деди АҚШ Давлат департаменти вакили. Дипломатнинг сўзларига кўра, АҚШ авиацияси Алеппода ҳеч қандай операциялар ўтказмаган.
ИШИДга қарши курашувчи АҚШ бошчилигидаги коалиция вакили ҳам худди шундай баёнот билан чиқди.
Эслатиб ўтамиз, олдинроқ Россия Мудофаа вазирлиги расмий вакили Игорь Конашенков Туркия ҳудудидан Сурияга кириб келган АҚШнинг иккита A-10 штурмчи самолёти Алепподаги тўққизта объектга зарба берганини маълум қилганди.
Изоҳ (0)