Бундан 104 йил олдин Атлантика океанида ҳалокатга учраган йўловчи лайнерининг айнан нусхаси — «Титаник-2» 2018 йилда ўзининг биринчи сафарига чиқади. Бу ҳақда лойиҳани амалга ошираётган Blue Star Line компанияси вакили маълум қилди, деб хабар беради «ТАСС».
9 палубадан иборат янги кеманинг узунлиги 270 метрни, баландлиги 53 метрни ва сув сиғими 40 минг тоннани ташкил этади. 840 та каютада 2400 йўловчи ва 900 нафар экипаж аъзоси жойлашиши мумкин. Саёҳатчилар ихтиёрида худди олдингидек биринчи, иккинчи ва учинчи тоифадаги каюталар бўлади. Кема Хитойнинг Цзянсу провинциясида қурилмоқда.
«Янги ‘Титаник’ албатта, замонавий эвакуация воситалари, сунъий йўлдош назорати, рақамли навигация ва радиолокация тизими билан жиҳозланади», — деди Blue Star Line компаниясининг маркетинг бўйича директори Жеймс Макдональд.
Саутгемптондан Нью-Йорк шаҳрига йўл олган биринчи «Титаник» 1912 йилнинг 14 апрель куни, соат 23:40 да айсберг билан тўқнашган, орадан икки ярим соат ўтгач, чўкиб кетган. Йўловчи ва экипаж аъзоларидан иборат 2224 кишидан 1513 киши ҳалок бўлган.
Изоҳ (0)