Олдиндан келишмасдан, ўзаро биз унга француз оҳангида жажжи Биби деб ном бердик. Қошлари нозли кўтарилган, ўйноқи, лекин вақти-вақти билан маъюс кўзлар, талай савол — офтоб нега чарақлайди, шифохона кимники, дарахтлар нимага ўсади, нега юракда игна санчади, дадам қаерда....
Бибисора Жўраева энди учдан тўртга қадам қўйди. Форс тилидан таржима қилинса исмининг маъноси — энг яхши қиз. Онаси Дилафрўз барча саволларига баҳузур, батафсил жавоб беради, фақат – «Дадам қаерда?» деган саволга жавоби йўқ, мум тишлаб қолади... Бибининг отаси у туғилмасдан, уч ярим йил олдин Россияга бедарак кетиб қолган, энг яхши қизга эса туғруқхонанинг ўзидаёқ туғма юрак хасталиги — юрак қоринчалари ўртасидаги парда нуқсони (ЮҚЎПН) ташхиси қўйилган.
Ҳар минг нафар янги туғилган чақалоқнинг уч нафари ЮҚЎПН билан туғилади. Қоринчалар ўртасидаги парда, ўз номига кўра юрак қоринчаларини бўлиб туради. Табиат унда ҳеч қандай тешик бўлишини кўзда тутмаган, Бибисора туғилганда эса пардада 3 мм тешик бор эди. Уч ёшга тўлгунга қадар у катталашиб, 7 миллиметрга етди. Бундай жараённи кузатган шифокорлар вақтни қўлдан бой бермасдан, тезроқ операция ўтказишни тавсия қилди.
Ривожланган мамлакатларда шундай ташхиси аниқланган болаларни, агар тиббий тақиқлар бўлмаса, умрининг биринчи йилидаёқ операция қилишади. Бизларнинг шифокорлар ҳам шундай қилишга қодир, лекин очиқ юракда операция ўтказиш учун оксигенатор — газ алмаштирувчи, бир маротаба ишлатиладиган мослама зарур. У қонни кислород билан таъминлайди ва ишлатилган газлардан қонни тозалайди. Ҳамма муҳтож бўлганларни бу қимматбаҳо мослама билан таъминлашга давлатнинг ҳозирча қурби етмайди.
Қўлида икки бола билан ёлғиз қолган Дилафрўз операцияга зарур бўлган барча материалларни ва оксигенаторни сотиб олиш учун етарли пулни жамлай олмади. Давлат Бибисорага озгина нафақа — 250 минг сўм тўлайди. Юрак хасталигига мубтало бўлган болалар алоҳида парвариш ва ғамхўрликка муҳтож, шу сабабли Дилафрўз, бозори чаққон аёллар сартароши бўлса-да, тўла кун ишлаб, пул топишга имкони йўқ.
Бибисора Жўраевага операция қилиш учун зарур бўлган маблағ «Ҳаётларни биргаликда қутқарайлик» акцияси давомида жамланди. 2015 йилнинг ноябрь ойи мобайнида «Сочная долина» шарбатининг сотилган ҳар бир қутисидан тушган пулнинг муайян қисми Тошкент педиатрия институти клиникасининг ҳисоб рақамига ўтказилган эди. Акция 15 нафар боланинг операциясига етарли маблағ жамлашга муваффақ бўлди. Ўз беморларини туғилганидан бери ёки юрак хасталиги ташхиси қўйилган кундан яхши биладиган шифокорлар ўзлари кам таъминланган оилаларда истиқомат қилувчи операцияга ўта муҳтож бўлган 15 беморни танлаб олди.
Бибисоранинг юраги 14 январь куни операция қилинди ва, шифокорлар айтишича, у муваффақиятли ўтди. Энди жажжи Бибисора бизларга ўзининг «махсус маржони»ни — ўмровости томирга қўшилган катетерни намойиш қилиб, «ҳай-ҳай кўйлаклари», Олмалиқда кутиб ўтирган опаси Муслима, «алло, алло, юракжон!» деб, юраги билан гаплашадиган шифокорлар тўғрисида чуғурлаб, «мен улғайганимда катта бўламан» деб тўхтамай гапирмоқда. Илоҳим, шундай бўлсин!
Реклама ҳуқуқи асосида
Изоҳ (0)