Бобурийлар авлодидан бўлган ҳукмдор Жаҳонгир зарб эттирган тилла танга Мумбайдаги аукционда 235 минг долларга сотилди

Бобурийлар авлодидан бўлган император Жаҳонгир томонидан 400 йил аввал зарб эттирилган ва буржий чаён акс эттирилган тилла мохур (танга) Мумбайдаги аукционда рекорд даражадаги сумма — 15,5 миллион рупий (235 минг доллар)га сотилди. Бу ҳақда «ТАСС» хабар бермоқда.

«Бу Ҳиндистонда чиқарилган танга учун берилган энг юқори нарх. Олдинги рекорд 4,5 миллион рупий (68 минг доллар)дан иборат эди», — дея маълум қилган Todywalla аукцион уйи вакили Малькольм Тодивалла.

Диаметри 2 сантиметр бўлган «тилла чаён»га 8 миллион рупий бошланғич нарх қўйилганди. Якунда эса аукцион уйи режалаштирганидан икки баробар кўп маблағ ишлаб олди. Тангани сотиб олган ва ўзини ошкор этмаган мумбайлик бизнесмен ҳам зиён кўрмаслиги аниқ: 6 январь куни Нью-Йоркда бўлиб ўтган кимошди савдосида шунга ўхшаш танга 450 минг долларга сотилгани айтилмоқда.

Мумбайдаги аукционда Жаҳонгир вафотидан сўнг унинг рафиқаси малика Нуржаҳон томонидан чиқарилган танга ҳам харидорини топди: савдога 5 миллион рупий бошланғич баҳо билан чиқарилган танга 7,6 миллион рупий (115 минг доллар)га сотилди.

Тилла мохур илк бор Жаҳонгирнинг отаси, император Акбар томонидан 1562 йилда чиқарилган. Унинг пробаси ўта юқори (камида 980), оғирлиги эса 11 грамм атрофида бўлган. Мохур барча мусулмон давлатлари тангалари каби тасвирларсиз бўлган. Жаҳонгир ўзи ҳукмронлик қилган даврда (1605—1627) бу тартибни ўзгартириб, бурж белгилари тасвирланган ва ҳозирда бутун дунё коллекционерлари орзусига айланган тангалар туркумини чиқарган.