Берлин прокуратураси Россиянинг «Биринчи канал» журналисти Иван Благойга қарши тергов жараёнини бошлади. Благойнинг Берлинда рус тилида сўзловчи 13 ёшли қизнинг йўқолиб қолганлиги ҳақидаги сюжети устидан немис адвокати Мартин Лютле шикоят берганди, деб хабар қилади Meduza.
Лютленинг сўзларига кўра, айни вақтда адвокатнинг аризасига кўра, текширув ишлари бошланган. Благойга ҳозирча ҳеч қандай айблов эълон қилингани йўқ.
Мартин Лютле Берлин прокуратурасига мурожаат қилиб, «Биринчи канал»да эфирга узатилган сюжет устидан шикоят қилганди. Адвокат ҳуқуқни муҳофаза қилувчи органлардан сюжетда миллатлараро ихтилофни юзага келтириш белгилари бор-йўқлигини текширишни сўради. Лютленинг фикрига кўра, сюжет Россия телевидениесида чиққанига қарамай, уни рус тилида сўзлашувчи олти миллионгача Германия фуқароси кўриши мумкин эди.
Иван Благойнинг сюжети 16 январда эфирга узатилди. Унда Берлинда яшовчи рус тилида сўзлашувчи оиланинг 13 ёшли қизи йўқолиб қолгани ва 30 соатдан бери уйига қайтмаётгани айтилади. Сюжетда қизчани муҳожирлар зўрлаган бўлиши мумкинлиги, полиция эса жиноятни яшираётгани ҳақида сўз боради.
Бир неча кундан кейин шаҳар марказида зўравонликка қарши митинг ўтказилди ва унда юзлаб одамлар иштирок этди. Берлин полицияси сюжетда айтилганидек, одам ўғирлаш ва зўрлаш содир бўлмагани, қизча эса дўстининг уйида ота-онасидан яшириниб олганини аниқлади.
Изоҳ (0)