Солиқ қўмитаси мол-мулк ва ер солиғидан қарздор ташкилотлар ходимларини огоҳлантирди

Ўзбекистонда бюджет ва бошқа ташкилотлар ходимларида мол-мулк ҳамда ер солиғидан қарздорлик 563 млрд сўмдан ортган. Бу ҳақда Солиқ қўмитаси хабар берди.

Жорий йил 8 июль ҳолатига кўра, 214,4 минг ташкилотнинг 1 млн нафардан ортиқ ходими ер солиғидан 348,2 млрд сўм, мол-мулк солиғидан 215,5 млрд сўм қарздор. Шундан энг кўп қарзлар (433,7 млрд сўм) тижорат ташкилотлари ходимларига тегишли. Қолганлари бюджет (107 млрд сўм) ва нодавлат-нотижорат ташкилотлари (23 млрд сўм) вакиллари тўламаётган қарзлардир.

Тижорат ташкилотлари ишчиларининг соҳалар кесимида ер ва мол-мулк солиғидан энг кўп қарзлари қуйидагича:

• Қишлоқ хўжалиги — 107,3 млрд сўм ;
• Саноат — 97,9 млрд сўм;
• Савдо — 66,3 млрд сўм;
• Қурилиш — 63,5 млрд сўм.

Ходимлари нисбатан кўп солиқ тўлаши лозим бўлган ташкилотлар:

• “Темирйўлларинфратузилма” АЖ — 6,5 млрд сўм;
• “Олмалиқ кон-металлургия комбинати” АЖ — 6,3 млрд сўм;
• “Ҳудудий электр тармоқлари” АЖ — 5,7 млрд сўм.

Солиқ қўмитаси ташкилотлар ходимларига огоҳлантириш бериб, қарздорликни зудлик билан бартараф этишга чақирди. Солиқларни ўз вақтида тўламаслик, кечиктирилган ҳар бир календарь кун учун пеня ҳисобланишига сабаб бўлишини билдирди. 

“Агар жисмоний шахснинг умумий солиқ қарзи 1 млн сўмдан ошса, қарз суд орқали қарздорнинг мулки ҳисобидан ундирилиши мумкин. Бу эса қарздорнинг мол-мулки хатланиши ва айрим чекловлар ўрнатилишига сабаб бўлиши мумкин. Шу сабабли солиқларни ўз вақтида тўлашни унутманг”, дейилади қўмита хабарида.

Тўловни Солиқ мобил иловаси орқали солиқ ёки банк идораларига бормасдан, масофадан туриб амалга ошириш мумкинлиги эслатилган.

Аввалроқ 2025 йилнинг I ярмида Ўзбекистондаги 1 минг 64 та корхона 13,1 трлн сўмлик солиқ базасини яширгани фош этилгани хабар қилинганди. Солиқдан қошичга уринга мазкур корхоналарга нисбатан жами 2,6 трлн сўм жарима қўлланилган.

Маълумот учун, жорий йил апрелда мамлакатда жами 8,5 трлн сўмлик тўланмаган солиқлар борлиги айтилган. Январь июнь ойларида солиқ ҳуқуқбузарликлари ҳақида хабар берган фуқароларга 17,7 млрд сўм мукофот пуллари тўлангани хабар қилинганди.