Жорий йил ярмида чет элга доимий яшаш мақсадида кўчиб кетганлар сони 2024 йил мос даврига нисбатан 10 фоиз атрофида ошди. Бу ҳақдаги маълумотлар Статистика қўмитасининг навбатдаги шарҳида келтирилган.
Олти ой давомида Ўзбекистондан 5 минг 551 киши хорижга доимий яшаш учун кўчиб кетган. Бироқ аввалгилардан фарқли равишда аҳоли қайси давлатларга боргани очиқланмаган.
Таққослаш учун, 2024 йил I ярмида 5 минг 66 ўзбекистонлик чет давлатларга кўчганди. Бунда энг кўп улуш қўшни Қозоғистон ҳиссасига тўғри келган — 4 минг 128 киши. Кейинги ўринда Россияни (760 киши) танловчилар кўпроқ бўлган.
Жорий йил I ярмида Ўзбекистонга хориждан кўчиб келганлар сони 673 киши бўлди. Ўтган йилнинг мос даврида бу рақам 1 минг 80 та эди.
Хорижга кўчиш тенденцияси
2024 йилда жами 10 минг 842 нафар ўзбекистонлик хорижий давлатларга доимий яшаш учун кўчиб кетган. Хусусан, Қозоғистонга 8 минг 792 киши, Россияга 1 минг 601 киши борган. Мамлакатни тарк этганлар улуши яна Жанубий Корея (96 киши), Қирғизистон (73 киши), Туркманистон (39 киши) ва бошқа мамлакатлар (241 киши) ҳиссасига тўғри келган.
Бир йил аввалги рақамларга қараганда, яъни 2023 йилда чет элга кўчиб кетганлар сони 17 минг 336 киши бўлган. Жумладан, Қозоғистоннинг ўзига 14 минг 51 киши, Россияга 2 минг 670 одам кўчиб кетган.
Бундан ўн йиллар олдинги рақамлар анча катта эди. Масалан, 2010 йилда Ўзбекистондан хорижга 44 минг 420 киши, 2011 йилда 50 минг 816 киши, 2012 йилда 45 минг 447 киши кўчиб кетган. 2015 йилдан четга кўчиш тренди сезиларли пасая бошлаган, йил давомида 31 минг 765 киши мамлакатни тарк этган.
Изоҳ (0)