Ўзбекистонлик шахматчилар Moscow-Open турнирининг 6-турида мағлубиятга учради

Россия Федерацияси пойтахти Москва шаҳрида шахмат бўйича нуфузли Moscow-Open 2016 фестивали бўлиб ўтмоқда. Бу ҳақда «Оламспорт» хабар қилмоқда.

Мусобақанинг энг кучли шахматчилари жам бўлган ва асосий турнири ҳисобланган «А» гуруҳида Шамсиддин Воҳидов илк мағлубиятини қабул қилиб олди. Ёш шахматчи кеча ўтказилган 6-турда қора доналарда ҳаракат қилиб, рейтингда ўзидан анча юқорида турган рақиби россиялик гроссмейстер Артём Тимофеевга имкониятни бой бериб қўйди.

Бу мағлубиятдан сўнг Воҳидов 4,5 очко билан қўшимча кўрсаткичларга кўра 13-ўринни эгаллаб турибди. Турнир жадвалида юз фоизлик натижа – 6 очко билан россиялик Юрий Елисеев пешқадамлик қиляпти. Кучлилар гуруҳида қатнашаётган яна бир ўзбекистонлик шахматчи Нодирбек Абдусатторов ҳам бу турда мағлубиятга учради. У қора доналарда россиялик гроссмейстер Дмитрий Фроляновдан енгилди. Абдусатторов 3,5 очко билан 65-поғонадан жой олган.

Бу турда ўзбекистонлик шахматчилардан Элбек Алиқулов, Роман Голубев ва Жавлонбек Умаровлар тегишинча россиялик Иван Селиванов, озарбайжонлик Аҳмад Аҳмадзода ҳамда яна бир мезбон шахматчи Владислав Григоревни мағлуб этди. Тимур Игонин, Константин Раҳматуллаев, Сабоҳат Зайниддинова, Полина Вербова, Сарвиноз Қурбонбоева ва Гулруҳбегим Тоҳиржоновалар мағлубиятга учради.

Эслатиб ўтамиз, ўзбекистонлик 3 нафар шахматчи Moscow-Open турнирининг 4-турида ғалаба қозонган эди.