Россиянинг Санкт-Петербург шаҳрида кўп қаватли турар-жой биноси деразасидан ташлаб юборилган уч ойлик қизча ҳушига келди. Бу ҳақда 5-рақамли болалар шифохонаси вакили маълум қилди, деб хабар беради «Вести.ru».
Чақалоқ ҳозирда ўзи нафас олмоқда. Аммо унинг ҳолати бирдан яхшиланганлиги ҳақида гапиришга эрта. «Унинг аҳволи қанчалик яхшилангани ҳақида камида икки суткадан кейин гапириш мумкин», — деди болалар шифохонаси вакили.
Эслатиб ўтамиз, 2 февралга ўтар кечаси Санкт-Петербургда яшовчи 35 ёшли аёл чақалоғи билан кўп қаватли турар-жой биноси деразасидан ўзини ташлаб юборган. Қизалоқ танасининг бир неча еридан жароҳат олганига қарамай, омон қолган, унинг онаси эса ҳодиса жойида вафот этган. Шифокорларнинг сўзларига кўра, қизчанинг миясида унинг ногирон бўлиб қолишига олиб келувчи шикастланишлар аниқланмаган.
Терговчилар «кичик ёшли шахсни ўлдиришга суиқасд қилиш» моддаси бўйича жиноят ишини қўзғади. Дастлабки маълумотларга кўра, аёл туғуруқдан кейинги руҳий тушкунликдан азият чеккан.
Эрининг сўзларига кўра, аёл биринчи ҳомиладорлигида шифокорлар хатоси қурбони бўлган, шундан сўнг иккинчи сафар ўз уйида — эри ва акушернинг иштирокида туғишга қарор қилган.
Изоҳ (0)