Шу кунларда Россия Федерацияси пойтахти Москва шаҳрида шахмат бўйича нуфузли Moscow-Open 2016 фестивали бўлиб ўтмоқда. Ушбу анъанавий тарзда ўтказиб келинаётган мусобақада ўзбекистонлик ёш шахматчилар ҳам муваффақиятли иштирок этяпти, деб хабар қилади «Оламспорт».
Мусобақанинг энг кучли шахматчилари жам бўлган ва асосий турнири ҳисобланган «А» гуруҳида Шамсиддин Воҳидов мағлубиятсиз одимлаяпти. Шамсиддин ҳозиргача ўтказилган 4 та партиядан 3 тасида ғалаба қозониб, биттасида дуранг қайд этди. Кеча, 2 февраль куни ўтказилган 4-тур учрашувида Шамсиддин ўзидан рейтингда юқорида турган рақиби россиялик Никита Матинянни мағлубиятга учратди.
Турнирнинг аёллар ўртасидаги баҳсларида мағлубиятсиз одимлаётган Гулруҳбегим Тоҳиржонова эса қора доналарда ўйнашига қарамай, кучли рақибаси россиялик Татьяна Степоваяни таслим этди. Бу билан Гулруҳбегимнинг очколари 3,5 тага етди.
Ўзбекистонлик яна бир шахматчи Нодирбек Абдусатторов 2 февраль куни мусобақадаги учинчи ғалабасига эришди. Нодирбек қора доналарда ҳаракат қилганига қарамай, россиялик Иван Фроловни мот қилди. Абдусатторов 4 имкониятдан 3 очкога эга бўлиб турибди. Сарвиноз Қурбонбоева эса бу турда мағлубиятга учради.
Изоҳ (0)