«Барселона» ҳужумчиси Лионель Месси клуб академиясининг бир нечта болалар жамоалари капитанлари билан учрашди, дея хабар бермоқда «Чемпионат». Ёш ўйинчилар Аргентина термаси футболчисидан интервью олди, у болаларга ўзи ва орзу-истаклари ҳақида гапириб берди.
«‘Олтин тўп’ларни ўз уйимда сақлайман. Унинг аҳамиятини эътиборга олган ҳолда, бу мукофотни қўлга киритиш жуда ёқимли. Лекин мен ‘Олтин тўп’ни бошқа ўйламаяпман ва мавсумдаги вазифаларимизга диққат-эътибор қаратмоқдаман. 2015 йилдаги муваффақиятларни такрорлашни истардим. Унвонларни қўлга киритишда давом этишга ҳаракат қиламан. Мен доим ‘Барселона’ барча мусобақаларда ғолибликка даъво қилишини айтиб келганман, бу жамоамизнинг вазифаси», — деди Месси.
Нашр эслатишича, 2015 йил якунларига кўра, «Барселона» Испания чемпионати, Мамлакат кубоги, Чемпионлар лигаси, УЕФА суперкубоги ва клублар ўртасида жаҳон чемпионатида ғалаба қозонди. Мессининг ўзи йилнинг энг яхши футболчиси номига сазовор бўлди.