«Манчестер Сити» Хосеп Гвардиола билан уч йиллик шартнома имзолаганини эълон қилди

«Бавария» футбол клуби бош мураббийи Хосеп Гвардиола 2015/2016 йилги мавсум якунига етганидан сўнг, «Манчестер Сити»да иш бошлайди. Бу ҳақда Манчестер клуби матбуот хизмати маълум қилди.

Англия клуби баёнотига кўра, испаниялик 45 ёшли мураббий «Манчестер Сити» билан уч йиллик шартнома имзолаган.

#mcfc club statement February 1 2016.

Read: https://t.co/WQpS2BNRm5 pic.twitter.com/hyHNW3hfdZ

— Manchester City (@ManCity) February 1, 2016

Хабар беришларича, «Манчестер Сити» турли миш-мишлар пайдо бўлишининг олдини олиш мақсадида Гвардиоланинг клубда иш бошлаши ҳақида олдиндан хабар беришга қарор қилган.

«Sports.ru»нинг хабар беришича, «Манчестер Сити» Гвардиолани клубга биринчи марта 2012 йилда таклиф қилганди. Тасдиқланмаган маълумотларга кўра, Гвардиола янги клубида йилига 25 миллион евро миқдорида маош олади.

Эслатиб ўтамиз, Гвардиола 2008—2012 йилларда «Барселона»га мураббийлик қилган ва клуб билан 14 та совринни қўлга киритган. У 2013 йилдан бери «Бавария»да ишламоқда, ўтган давр мобайнида 5 та соврин эгасига айланди.

«Манчестер Сити»га ҳозирда Мануэл Пеллегрини устозлик қилмоқда. 2013 йилда жамоа бош мураббийи этиб тайинланган чилилик мазкур мутахассис 2013/2014 йилги мавсум якунига кўра Англия чемпионлигини, шунингдек, 2014 йили Англия Лига Кубогини қўлга киритган.