«Яблоко» партиясининг федерал сиёсий қўмитаси аъзоси Сергей Митрохин Федерал хавфсизлик хизмати раҳбари Александр Бортников ва бош прокурор Юрий Чайкага Чеченистон раҳбари Рамзан Қодировга нисбатан жиноят иши қўзғатишни сўраб мурожаат қилди, деб ёзади «Газета.ru».
Партия сайтида айтилишича, Қодиров бир неча марта оғзаки ва ёзма нутқида Россия мухолифатига қарата айбловлар билдирган, улар «Ғарб махсус хизматлари томонидан ўйлаб топилган ўйинларни ўйнаётган» «сотқинлар», «халқ душманлари» каби ибораларни ўз ичига олган.
Митрохин бош прокурордан экстремистик фаолиятни амалга оширишга йўл қўйиб бўлмаслик ҳақида огоҳлантириш беришни сўраган. У, шунингдек, Федерал хавфсизлик хизмати директоридан Россия Жиноят кодексининг экстремистик фаолиятга оммавий даъват этиш ва экстремистик ташкилот фаолиятини ташкил қилиш моддалари бўйича жиноят иши қўзғашни талаб қилди.
Эслатиб ўтамиз, Рамзан Қодиров Instagram’ига «ПAРНАС» (Халқ озодлик партияси) етакчиси Mиxаил Касьяновнинг снайпер нишони визуал эффекти қўлланилган видеосини эълон қилган эди, унда журналист кичик Владимир Кара-Мурза ҳам акс этган. Қодиров Instagram’даги видеосини «Касьянов Россия мухолифати учун пул олишга Страсбургга келди. Тушунмаганлар тушуниб олади» — дея шарҳлаган.
Кейинроқ Рамзан Қодировнинг Instagram’идан сиёсатчи Mиxаил Касьянов «нишон остида» тасвирланган видео ўчирилган, у ижтимоий тармоқ қоидаларига зид деб ҳисобланган эди.
12 январь куни Қодиров тизимдан ташқари мухолифатга нисбатан кескин фикр билдирган эди. У мухолифат вакилларига нисбатан «халқ душмани»га бўлгани каби муносабатда бўлишга чақирган эди. Чеченистон раҳбарининг ушбу сўзлари қизғин муҳокамаларга сабаб бўлди.