Хитойнинг Гуанчжоу шаҳрида 67 йил ичида биринчи марта қор ёғди

Хитой жанубидаги Гуандун провинциясининг маъмурий маркази Гуанчжоу шаҳрида ҳаддан ташқари совуқ туфайли 67 йил ичида биринчи марта қор ёғди, деб хабар беради «ТАСС».

Маҳаллий ОАВларнинг таъкидлашича, ушбу тропик мегаполисда қор ёғиши 1949 йилда ХХР ташкил қилингандан бери биринчи марта содир бўлди.

Ҳукумат совуқ туфайли хавфлиликнинг энг юқори — «қизил» даражасини эълон қилди. Ҳозирда Гуанчжоуда ҳарорат Цельсий бўйича ноль градусга тушган.

Аҳолидан иссиқроқ кийиниш, ҳайдовчилардан қор ва ёмғир ёғаётган вақтда айниқса сергак бўлиб туриш сўралмоқда.

Жорий қиш Хитойда ҳаддан ташқари совуқ келди. Пекинда ўтган кеча ҳаво ҳарорати -17,4 даражага тушди. Бу 30 йил ичидаги энг паст кўрсаткичдир. Хитой пойтахтининг айрим туманларида ҳарорат -29,8 даражагача етди.