Қоҳирада 21 январь, пайшанба куни рўй берган портлаш оқибатида 10 киши ҳалок бўлди. Улардан етти нафари полициячи, уч киши эса тинч аҳоли вакили эканлиги айтилмоқда, яна 13 киши жароҳат олган, дея хабар беради «ТАСС».
Ҳодиса пойтахтнинг Гиза туманида, эҳромларга олиб борувчи Ҳарам кўчаси яқинидаги кўп қаватли уйда жойлашган хонадонлардан бирида содир бўлди. Полицияга ушбу бинода портловчи қурилмалар тайёрлашни йўлга қўйган террорчилар гуруҳи ҳақида маълумот берилади. Қўлга олиш гуруҳи хонадонга бостириб киради ва у ерда бир неча қўлбола портловчи қурилма борлигини аниқлайди. Бомбалардан бирини зарарсизлантириш чоғида кучли портлаш содир бўлади.
Воқеа жойида сапёрлар ва тиббий ходимлар ишламоқда. Портлаш туфайли бинонинг бир қисми вайрон бўлган. Куч тизими ходимлари ҳодиса рўй берган жойни ўраб олди, яқин атрофдаги барча кўчалардан чиқиш йўллари тўсиб қўйилган.
Изоҳ (0)