АҚШнинг Калифорния штати, Лос-Анжелес шаҳридаги Beverly Hilton Hotel’да бўлиб ўтган «Олтин Глобус» кинотелевизион мукофотининг тақдирлаш маросимини телевизор орқали 18,5 миллион киши томоша қилди. Бу ҳақда АҚШнинг Nielsen тадқиқот компанияси берган маълумотларга асосан «ТАСС» хабар қилмоқда.
Маълум қилинишича, NBC телеканали томонидан намойиш этилган маросимга тегишли хабарлар Twitter ижтимоий тармоғида 518 мингга яқин киши томонидан жойлаштирилди, улар билан 298,8 миллион фойдаланувчи танишиб чиқди.
2015 йилда «Олтин Глобус»нинг тақдирлаш маросимини телевизор орқали 19,3 миллион киши, 2014 йилда эса ― 20,9 миллион киши томоша қилиб, телекўрсатув учун бу сўнгги 10 йилдаги энг юқори кўрсаткич бўлган эди.
Nielsen компаниясининг таъкидлашича, жорий йилда кўпчилик америкача футбол ўйинини томоша қилишни маъқул кўрганлиги сабабли томошабинлар сони камайиб кетди.
Эслатиб ўтамиз, 11 январга ўтар кечаси «Олтин глобус» мукофотининг 73-тақдирлаш маросимида 25 йўналиш бўйича ғолиблар тақдирланди.
Изоҳ (0)