Футбол бўйича Аргентина миллий терма жамоаси ва Каталониянинг «Барселона» клуби ҳужумчиси Лионель Месси 2015 йил якунларига жаҳоннинг энг яхши футболчиси деб эълон қилинди. Бу ҳақда Швейцариянинг Цюрих шаҳрида ташкил этилган «Олтин тўп» тақдимотида маълум қилинди.
ФИФА матбуот хизмати ахборотига кўра, миллий терма жамоаларнинг мураббийлари, сардорлари ва матбуот котиблари ўртасида ўтказилган сўровнома якунларига кўра, Лионель Месси 41,33 фоиз, Мадриднинг «Реал» клуби ҳужумчиси, португалиялик Криштиану Роналду 27,76 фоиз, Мессининг клубдоши, бразилиялик Неймар эса 7,86 фоиз овоз тўплади.
Лионель Месси бунгача 2009, 2010, 2011 ва 2012 йилларда «Олтин тўп» мукофотини қўлга киритган эди. Мазкур кўрсаткич бўйича у ўз пешқадамлигини янада мустаҳкамлади. Криштиану Роналду, шунингдек, ўтмиш юлдузлари — Марко ван Бастен, Мишель Платини ва Йоҳан Кройфф каби футболчилар уч мартадан «Олтин тўп»ни қўлга киритган.
Маълумот учун, футбол бўйича АҚШ аёллар терма жамоаси сардори Карли Ллойд йилнинг энг яхши аёл футболчиси деб топилди. Қайд этиш жоиз, 2015 йилда жаҳон чемпионлигини қўлга киритган мазкур терма жамоа бош мураббийи Жилл Эллис йилнинг энг яхши аёл мураббийи деб топилган эди.
«Барселона» билан 2015 йил давомида бешта совринни қўлга киритган Луис Энрике «Йил мураббийи»га айланган бўлса, бразилиялик Уэнделл Лира томонидан киритилган тўп «Йил голи» дея тан олинди. Шунингдек, 11 январь куни бўлиб ўтган «Олтин тўп» тақдимотида 2015 йилнинг рамзий терма жамоаси ва Fair Play мукофоти эгаси номи ҳам маълум қилинди.
Изоҳ (0)