«Барселона» устози Луис Энрике ФИФА томонидан йил мураббийи деб топилди

ФИФА 11 январь куни Цюрихда ташкил этилган «Олтин тўп» тақдимотида 2015 йилнинг энг яхши мураббийлари номини эълон қилди.

Унга кўра, Каталониянинг «Барселона» жамоаси бош мураббийи Луис Энрике йилнинг энг яхши мураббийи деб топилди.

2015 йил давомида «Барселона» футбол клуби 45 ёшли Луис Энрике қўл остида Испания чемпиони ва Кубоги соҳибига айланди, шунингдек, Европа Чемпионлар Лигаси, Европа Суперкубоги ҳамда клублар ўртасидаги жаҳон чемпионатида ғолиб чиқди.

Йилнинг энг яхши мураббий номига, шунингдек, «Бавария» бош мураббийи Хосеп Гвардиола ҳамда Чили терма жамоаси устози Хорхе Сампаоли ҳам даъвогарлик қилган эди.

Маълумот учун, аёллар орасида йилнинг энг яхши мураббий деб футбол бўйича АҚШ аёллар терма жамоаси бош мураббийи Жилл Эллис топилди. АҚШ аёллар терма жамоаси 2015 йилда жаҳон чемпиони бўлди.

• Погба, Иньеста, Неймар, Месси ва Роналду ФИФАнинг йил рамзий терма жамоасидан ўрин олди