Яманда «Чегара билмас шифокорлар»га тегишли касалхонага ракета келиб тушди. Натижада тўрт киши ҳалок бўлди ва ўн киши яраланди. Бу ҳақда ташкилотнинг Twitter’даги расмий саҳифасида хабар берилди, деб ёзади Meduza.
Беморлар ва ходимлар яқин орадаги госпиталга эвакуация қилинди.
Ўққа тутилган шифохона мамлакат шимолидаги Саада вилоятининг Разех шаҳрида жойлашган. Бинодан унча узоқ бўлмаган ҳудудга камида яна битта ракета келиб тушган.
Ташкилот авиазарба айнан ким томонидан берилганига аниқлик кирита олмади.
Ташкилотнинг қайд этишича, бу октябрь охиридан бери учинчи марта Ямандаги «Чегара билмас шифокорлар»нинг касалхонасига авиазарба берилишидир.
Эслатиб ўтамиз, 2015 йил 3 октябрда ичида 200 га яқин киши бўлган Қундуз шаҳридаги «Чегара билмас шифокорлар» халқаро ташкилотининг шифохонаси АҚШ қўшинлари томонидан бомбардимон қилиниши оқибатида қисман вайрон бўлган. Ҳужум 30 кишининг ҳаётига зомин бўлган.
Изоҳ (0)