Yamanda “Chegara bilmas shifokorlar”ga tegishli kasalxonaga raketa kelib tushdi. Natijada to‘rt kishi halok bo‘ldi va o‘n kishi yaralandi. Bu haqda tashkilotning Twitter’dagi rasmiy sahifasida xabar berildi, deb yozadi Meduza.
Bemorlar va xodimlar yaqin oradagi gospitalga evakuatsiya qilindi.
O‘qqa tutilgan shifoxona mamlakat shimolidagi Saada viloyatining Razex shahrida joylashgan. Binodan uncha uzoq bo‘lmagan hududga kamida yana bitta raketa kelib tushgan.
Tashkilot aviazarba aynan kim tomonidan berilganiga aniqlik kirita olmadi.
Tashkilotning qayd etishicha, bu oktabr oxiridan beri uchinchi marta Yamandagi “Chegara bilmas shifokorlar”ning kasalxonasiga aviazarba berilishidir.
Eslatib o‘tamiz, 2015-yil 3-oktabrda ichida 200 ga yaqin kishi bo‘lgan Qunduz shahridagi “Chegara bilmas shifokorlar” xalqaro tashkilotining shifoxonasi AQSh qo‘shinlari tomonidan bombardimon qilinishi oqibatida qisman vayron bo‘lgan. Hujum 30 kishining hayotiga zomin bo‘lgan.
Izoh (0)