АҚШ адлия вазирлиги Германиянинг Volkswagen AG автоконцернини судга берди, деб ёзади «Интерфакс». Компанияни Тоза ҳаво тўғрисидаги қонун (Clean Air Act)нинг тўртта бандини бузишда айблашмоқда.
Айбловчи томон маълумотларига кўра, умумий жарима 80 миллиард долларга етиши мумкин, аммо адлия вазирлигидаги манба суд максимал жазо бериши амри маҳоллигини таъкидламоқда.
АҚШ фуқароларидан Volkswagen’га қарши юзлаб даъволар келиб тушган, камида еттита мамлакат, жумладан, Германия регуляторлари ҳамон текширув олиб бормоқда. Бундан ташқари, АҚШ ҳукумати компанияга нисбатан Атроф-муҳит муҳофазаси агентлигига ёлғон маълумот тақдим этгани учун жиноий иш қўзғатиши мумкин.
АҚШ атроф-муҳит муҳофазаси агентлиги ва Калифорния ҳаво ресурслари кенгаши 2014—2016 йиллар моделлар қаторига мансуб Volkswagen, Audi ва Porsche машиналарини тестдан ўтказиш чоғида кўрсатилган зарарли ташланмалар ҳажми мазкур транспорт воситаларидан фойдаланиш пайтида қайд этилганидан кам бўлганини аниқлаган эди.
Эслатиб ўтамиз, сентябрь ойи охирида Volkswagen’нинг дизель двигателлари атрофида катта можаро келиб чиқди. Компания ўзининг 11 миллион автомобилига ноқонуний дастурий таъминот ўрнатганини тан олди.
Изоҳ (0)