Barrett Jackson аукцион савдоларини ўтказиш уйи 1967 йилда ишлаб чиқарилиб, фантастик жангари руҳдаги «Трансформерлар 4: Қирғин даври» фильмида қатнашган Chevrolet Camaro автомобилини сотувга чиқаради. Фильмнинг асосий қаҳрамонларидан бири Бамблби исмли трансформерни тасвирлаш учун ушбу автомобилдан фойдаланишган. Бу ҳақда «Ўзавтосаноат» АК матбуот хизмати хабар бермоқда.
Ҳозирги вақтда Chevrolet Camaro автомобили «Трансформерлар» фильмининг режиссёри Майкл Бейга тегишли. Автомобиль буғда ишлайдиган 6-босқичли трансмиссияга эга V8 двигатели билан жиҳозланган. Двигатель қуввати ҳақида маълумот берилмаяпти, лекин ушбу нусха Chevrolet Camaro SS базасига қурилган бўлиб, икки версияда, яъни 375 ва 300 от кучи қувватига эга двигателлар билан таклиф қилинган.
Бундан ташқари, автомобиль стандарт версиясига қараганда бир қатор кучайтирилган деталларга эга. Мисол учун, диодчироқли ёриткичлар, сариқ рангли Ridetech Tiger Cage хавфсизлик каркаслари, углепластик олд сплиттерлар, кенгайтирилган ғилдирак аркалари, ҳамда пастпрофилли Nitto ғилдираклари билан жиҳозланган.
Ташқи томонидан Бамблби одатдаги Camaro’дан кузовнинг махсус бўялган қора-сариқ ранглари, автоботларнинг руль ва капотдаги шильдиклари ҳамда Майкл Бейнинг дастхати билан фарқланади.
Автомобиль сотиладиган аукцион 2016 йил январь ойида Американинг Аризона штатида бўлиб ўтади. Автомобилнинг бошланғич баҳоси тўғрисида маълумот берилмаяпти. Шуни айтиш мумкинки, ушбу аукционда «Форсаж» кинофильмининг биринчи қисмида суратга тушган Volkswagen Jetta автомобили ҳам сотилади.
Изоҳ (0)