Жанубий Корея ҳукумати КХДР томонидан 6 январга ўтар кечаси ўтказилган водород бомбаси синовини халқаро ҳамжамият учун номақбул ҳаракат деб атади. Бу ҳақда «РИА Новости» хабар бермоқда.
Эслатиб ўтамиз, КХДР 6 январь, чоршанба куни Тошкент вақти билан 6:30 да ўз тарихида биринчи марта водород бомбасини синовдан ўтказди. Шимолий Корея марказий телевидениеси орқали берилган баёнотга кўра, мамлакат ядровий қуролни ҳеч қачон биринчи бўлиб ишлатмайди.
«Шимолий Корея томони ўтказилган ядровий синов сабаб муносиб жавоб бериши учун Жанубий Корея ҳукумати халқаро ҳамжамият билан, хусусан, иттифоқчилар ва Корея яриморолидаги ядровий вазиятни барқарорлаштириш бўйича олти томонлама музокараларнинг иштирокчиси ҳисобланган мамлакатлар билан яқиндан ҳамкорлик қилади ва бошқа воситалар, жумладан, БМТ Хавфсизлик кенгашининг қўшимча санкциялари жорий этилиши учун барча чораларни ишга солади», — дейилади баёнотда.
«Жанубий Корея ҳукумати КХДРдан халқаро ҳамжамият мазкур мамлакат ихтиёрида ядровий қурол бўлишини ҳеч қачон қабул қилмаслигини тушунишни, ядровий дастурдан ва баллистик ракеталарни ишлаб чиқиш дастурларидан БМТ Хавфсизлик кенгаши резолюцияларида назарда тутилган тарзда тўлиқ воз кечишни талаб қилади», — дея қўшимча қилинган Жанубий Корея ҳукумати баёнотида.
Аввалроқ КХДР томонидан ўтказилган водород бомбаси синовини Япония ва АҚШ ҳам қоралаб чиққанди.
Воқеалар ривожи: КХДРнинг водород бомбаси
Изоҳ (0)