Janubiy Koreya hukumati KXDR tomonidan 6-yanvarga o‘tar kechasi o‘tkazilgan vodorod bombasi sinovini xalqaro hamjamiyat uchun nomaqbul harakat deb atadi. Bu haqda “RIA Novosti” xabar bermoqda.
Eslatib o‘tamiz, KXDR 6-yanvar, chorshanba kuni Toshkent vaqti bilan 6:30 da o‘z tarixida birinchi marta vodorod bombasini sinovdan o‘tkazdi. Shimoliy Koreya markaziy televideniyesi orqali berilgan bayonotga ko‘ra, mamlakat yadroviy qurolni hech qachon birinchi bo‘lib ishlatmaydi.
“Shimoliy Koreya tomoni o‘tkazilgan yadroviy sinov sabab munosib javob berishi uchun Janubiy Koreya hukumati xalqaro hamjamiyat bilan, xususan, ittifoqchilar va Koreya yarimorolidagi yadroviy vaziyatni barqarorlashtirish bo‘yicha olti tomonlama muzokaralarning ishtirokchisi hisoblangan mamlakatlar bilan yaqindan hamkorlik qiladi va boshqa vositalar, jumladan, BMT Xavfsizlik kengashining qo‘shimcha sanksiyalari joriy etilishi uchun barcha choralarni ishga soladi”, — deyiladi bayonotda.
“Janubiy Koreya hukumati KXDRdan xalqaro hamjamiyat mazkur mamlakat ixtiyorida yadroviy qurol bo‘lishini hech qachon qabul qilmasligini tushunishni, yadroviy dasturdan va ballistik raketalarni ishlab chiqish dasturlaridan BMT Xavfsizlik kengashi rezolyutsiyalarida nazarda tutilgan tarzda to‘liq voz kechishni talab qiladi”, — deya qo‘shimcha qilingan Janubiy Koreya hukumati bayonotida.
Avvalroq KXDR tomonidan o‘tkazilgan vodorod bombasi sinovini Yaponiya va AQSh ham qoralab chiqqandi.
Voqealar rivoji: KXDRning vodorod bombasi
Izoh (0)