Америка Қўшма Штатлари Эрон ва Саудия Арабистонини ўз ортидан Яқин Шарқдаги кескинликни оширувчи ҳамда суннийлар ва шиалар ўртасидаги зиддиятни авж олишига сабаб бўлувчи қарорлар қабул қилмасликка чақирди. Бу ҳақда «ТАСС» хабар бермоқда.
Давлат департаменти вакили «АҚШ ҳукумати Саудия Арабистонининг Эрондаги турли дипломатик ваколатхоналари яқинида норозилик акциялари ўтказилаётганидан хабардор» эканлигини маълум қилди. Бу намойишлар Саудия Арабистонида шиа уламоси, шайх Нимр ан-Нимрнинг қатл этилгани сабабли ўтказилмоқда.
АҚШ ташқи сиёсат идораси вакилининг айтишича, АҚШ маъмурияти дипломатик ваколатхоналарга ҳужумни қоралайди. Юзага келган вазиятда Вашингтон Эронни ўз халқаро мажбуриятларини тўлиқ адо этган ҳолда Саудия Арабистонининг дипломатик ваколатхоналарини ҳимоя қилишга чақирди. Давлат департаменти вакили сўзи якунида «Биз иккала томонни ҳам минтақада вазиятни кескинлаштирувчи қарорлар қабул қилишдан қочишга чақирамиз», деди.
Эслатиб ўтамиз, олдинроқ Теҳронда намойишчилар Саудия Арабистони элчихонасига бостириб кириб, жиҳозларни синдиргани ва ўт қўйишга урингани, улардан 40 нафари қўлга олингани ҳақида хабар берилганди.
Изоҳ (0)