Россия президенти Владимир Путин Федерал хавфсизлик хизмати (ФХХ) ходимлари томонидан қурол, махсус воситалар ва жисмоний кучдан фойдаланиш тартибини белгиловчи қонунни имзолади, деб хабар қилади «Ведомости».
Ҳужжатга кўра, ФХХ ҳарбий хизматчилари қурол, махсус воситалар ва жисмоний кучдан фойдаланишдан олдин улар ким эканлиги, ўз нияти ҳақида огоҳлантириши керак. Бу ўз навбатида фуқароларнинг қонуний талабларни бажаришига имкон яратади. Аммо махсус хизмат ходимлари «агар секинлашиш фуқаролар, ФХХ ходимларининг ҳаёти ва соғлиғига хавф солса ёки бошқа оғирлаштирувчи оқибатларга олиб келса, бундан ташқари, ФХХнинг объектлари, махсус юклари ва транспорт воситаларига ҳужум қилишни қайтараётганда» огоҳлантиришсиз ҳаракат қилиши мумкин.
ФХХ ходимлари уларнинг ҳаракати оқибатида жароҳат олганларга биринчи ёрдамни кўрсатиши ёки жабрланувчини шифокорга тезроқ олиб бориш учун чора кўриши керак. Қуролдан фойдаланиш фуқаронинг жароҳат олиши ёки ўлимига олиб келса, бу ҳақда 24 соат ичида прокурорни огоҳлантириш лозим.
ФХХ ходимлари «қонун томонидан ўрнатилган тартиб асосида» жанговар техника, қурол, махсус воситалар ва жисмоний кучдан фойдаланганида, фуқаролар ва ташкилотларга зарар етса, бунинг учун улар жавобгар бўлмайди.
Изоҳ (0)