Калифорния ҳукумати Сан-Бернардино округида фавқулодда ҳолат жорий қилди

Американинг Калифорния штати губернатори Жерри Браун 18 декабрь, жума куни Сан-Бернардино округида фавқулодда ҳолат эълон қилди. Бу ҳақда «ТАСС» хабар беради.

ОАВнинг маълум қилишича, ушбу чора бирор янги фавқулодда ҳодиса туфайли жорий этилмаган. Фавқулодда ҳолат шароитида штат ҳукумати округга қўшимча ёрдам, жумладан, молиявий ёрдам кўрсатиши мумкин. Бу каби ёрдам ходимлари теракт натижасида ҳалок бўлган округ соғлиқни сақлаш хизматига керак бўлганлиги таъкидланмоқда.

Эслатиб ўтамиз, 2 декабрь куни Сан-Бернардинодаги ногиронлар уйида содир бўлган отишма оқибатида 14 киши ҳалок бўлган ва 17 киши жароҳатланган эди.