2015 йилда дунё бўйича қочоқларнинг умумий сони 60 миллион кишидан ошиши мумкин. Бу ҳақда БМТ қочоқлар иши бўйича олий комиссари бошқармасининг 18 декабрь, жума куни чоп этилган ва жорий йил олти ойидаги ҳолат қамраб олинган маърузасида маълум қилинган, дея хабар беради «РИА Новости».
Маърузага кўра, 2015 йил 6 ойи мобайнида 1992 йилдан бери биринчи марта дунёдаги қочоқлар сони 20 миллион кишидан ошди (20,2 миллион). Бу ўтган йилнинг шу даврига нисбатан деярли бир миллионга кўп.
«2015 йилда зўравонлик туфайли кўчиб ўтишга мажбур бўлганлар сони илк бор 60 миллион кишидан ошиши мумкин. Бугунги кунда дунёдаги ҳар 122 кишидан бири ўз уйини иложсизлик туфайли тарк этган», — дея таъкидланади ҳужжатда.
БМТ қочоқлар иши бўйича агентлиги маълумотларига кўра, жорий йил 6 ойи мобайнида энг кўп қочоқларни Туркия (1,84 миллион киши), мамлакат аҳолисига нисбатан олганда эса Ливан (1000 нафар фуқарога 209 нафар қочоқ) қабул қилган.
Европа давлатлари орасида бу борада Германия етакчилик қилмоқда: 6 ой мобайнида мамлакат 159 минг кишини қабул қилган, бу деярли ўтган йилги кўрсаткич билан тенг. Иккинчи ўринда Россия қайд этилган —100 минг қочоқ. Улар асосан Украинадаги можаро туфайли уйини тарк этганлардан иборат.
Изоҳ (0)