Саудия Арабистони ўз аксилтеррорчилик коалициясини тузганини эълон қилди, дея хабар бермоқда «РБК» уларнинг қўшма баёнотига таяниб. Унга 34 та мамлакат кирди. Коалиция штаби Ар-Риёдда жойлашади.
«Бу мамлакатлар Саудия Арабистони бошчилигида терроризмга қарши кураш учун ҳарбий иттифоқ тузишга қарор қилди», — дейилади баёнотда. Унда таъкидланишича, коалиция мақсади «ислом миллатларини номларидан қатъи назар, ўлим уруғини сочувчи ва бегуноҳларга даҳшат солувчи барча террорчилик гуруҳлари ва ташкилотлари ёвузлигидан ҳимоя қилишдан иборат».
Коалицияга Саудия Арабистони, Иордания, БАА, Покистон, Бангладеш, Баҳрайн, Бенин, Туркия, Чад, Того, Тунис, Жибути, Сенегал, Судан, Сьерра-Леоне, Сомали, Габон, Гвинея, Фаластин, Комор ороллари Федерал Ислом Республикаси, Қатар, Кот-д’Ивуар, Кувайт, Ливан, Ливия, Мали, Мальдив ороллари, Малайзия, Миср, Марокаш, Мавритания, Нигер, Нигерия, Яман, Уганда кирди. Бундан ташқари, ўндан ортиқ бошқа ислом мамлакатлари Саудия Арабистони коалициясини қўллаб-қувватлашини билдирган.
Айни пайтда Саудия Арабистони Қатар, Буюк Британия, Германия ва Франция билан биргаликда, АҚШ томонидан ташкил қилинган аксилтеррорчилик коалицияси аъзоси ҳисобланади. Саудия Арабистони, шунингдек, Башар Асад ҳукуматига қарши чиқмоқда ва Суриядаги мухолифат гуруҳларини қўллаб-қувватламоқда.
Изоҳ (0)