NASA Ойнинг 2016 йил давомида Ердан туриб кузатиладиган либрациялари (тебранишлари) ва фазалари акс этган компьютер дастури ва тегишли видеони тақдим этди. Бу ҳақда «Сегодня.ua» хабар бермоқда.
Видеода Ойнинг Ер атрофидаги эллиптик орбита бўйлаб ҳаракати вақтида юз берадиган либрациялари қайд этилган. Бу ҳолат Ер аҳолисига Ой сатҳининг фақат 60 фоизини кўриш имконини беради.
https://www.youtube.com/watch?v=Y3xokCzDwLI
Табиий йўлдошнинг Ер атрофидаги ҳар бир соатлик айланиши видеонинг бир кадрига мос келади. Тасвирнинг юқори даражада аниқлиги сабаб, видеода кратерлар ва жойи ўзгараётган терминатор (нур ва соянинг ажралиш чизиғи)ни кўриш мумкин.
Компьютер дастури Ернинг жанубий яримшарида турган одамга нисбатан Ойнинг 2016 йилдаги исталган ой, кун ва соатдаги ҳолатини кўриш имконини беради. Бунинг учун дастурдаги тегишли майдонга керакли маълумотларни киритиш кифоя.
Инновацион дастурий таъминоти шарофати билан, реал вақт режимида Ойнинг кўринадиган диаметрини ва ундан Ергача бўлган масофани кузатиш, олинган тасвирни эса бевосита сайтдан юқори ўлчамда юклаб олиш мумкин.
NASA ушбу дастурни 2009 йилдан бери орбитада бўлган LRO Ой сунъий йўлдоши ёрдамида олинган маълумотлар асосида ишлаб чиққан. Мазкур қурилма лазерли баландлик ўлчагич ва камера билан таъминланган бўлиб, улар ёрдамида Ойгача бўлган масофани аниқлаш ва Ер табиий йўлдоши сатҳининг юқори аниқликдаги суратларини олиш мумкин.
Изоҳ (0)