Facebook ижтимоий тармоқ фойдаланувчилари ўртасида 2015 йил якунлари бўйича энг кўп муҳокама этилган мавзулар рейтингини эълон қилди. Топ-10 жорий йил январидан декабрга қадар Facebook постларида у ёки бу мавзу қанча кўп тилга олингани асосида тузилган, дея хабар беради «ТАСС».
Маълум бўлишича, фойдаланувчилар ўртасида энг кўп АҚШ президентлигига сайловлар мавзуси муҳокама этилган. Кейинги ўринда 13 ноябрда Парижда рўй берган терактлар, учинчи ўринда эса Суриядаги фуқаролар уруши ва қочоқлар масаласи қайд этилган.
Шунингдек, Непалдаги зилзила, Грециядаги қарз билан боғлиқ инқироз, никоҳлар тенглиги, ИШИДга қарши кураш, террорчиларнинг Парижда Charlie Hebdo таҳририятига ҳужуми, Балтимордаги норозиликлар, Чарльстондаги фожиа ва Конфедерация байроғи атрофидаги баҳслар ҳам мазкур рейтингдан ўрин олган.
Дунё сиёсатдонлари орасида Facebook’да АҚШ президенти Барак Обама, АҚШ президентлигига номзод Дональд Трамп, Бразилия президенти Дилма Руссефф тез-тез тилга олинган. Энг кўп муҳокама этилган спортчилар қаторида боксчилар Флойд Мейвезер ва Мэнни Пакьяо қайд этилган. Энг оммалашган фильм «Юлдузлар жанги: кучнинг уйғониши», сериал «Тахтлар ўйини», компьютер ўйини эса FIFA-15 бўлган.
Изоҳ (0)