Бурунди пойтахти Бужумбура яқинида мамлакат ҳарбий базаларига уюштирилган ҳужумдан сўнг камида 21 кишининг жасади топилди. Бу ҳақда «ТАСС» хабар бермоқда.
Маълумотларга кўра, ҳалок бўлганларнинг барчаси отиб ўлдирилган, улардан айримларининг қўллари боғланган. Жасадлар топилган ҳудудга ҳужум уюштирилмагани айтилмоқда.
11 декабрь, шанба куни ўттиздан ортиқ жангари Бужумбурадаги учта, шаҳар ташқарисидаги битта ҳарбий базага ҳужум қилган. Улардан 12 нафари йўқ қилинган, 20 киши қўлга олинган. Мамлакат расмийлари жангарилар қамоқхоналардан маҳбусларни қочириб юбориш учун қурол-аслаҳаларни қўлга олмоқчи бўлганини таъкидлади. Тўқнашувларни бир гуруҳ ҳарбийларнинг ҳукуматга қарши исёни сифатида баҳолаганлар ҳам бор.
Бурундида мамлакат президенти Пер Нкурунзиза шу йил апрель ойида учинчи муддатга сайланиш режасини эълон қилганидан бери тартибсизликлар давом этмоқда. Тўқнашувларда ҳозиргача 240 дан зиёд одам нобуд бўлган.
Изоҳ (0)