Мексиканинг Акапулько шаҳрида 80 та мактаб жиноятчилик авж олгани туфайли муддатидан олдин таътилга чиқди

Мексиканинг Герреро штати, Акапулько шаҳрида 80 та мактаб жиноий гуруҳлар таҳдиди туфайли Рождество муносабати билан таътилга муддатидан олдин чиқди. Бу ҳақда штат маориф вазирлиги вакили Альфредо Миранда Вергара маълум қилган, дея хабар беради «ТАСС».

Вергаранинг таъкидлашича, федерал ва муниципал ҳуқуқ-тартибот идораларининг ўқув юртларини қўриқлаш бўйича ҳамкорликдаги операциясига қарамай, ўқитувчилар ўзини хавфсиз ҳис этмаяпти. Шу сабаб 80 та мактаб аслида 22 декабрда бошланадиган таътилдан олдин ёпилган.

Акапулькода ноябрь ўрталаридан бошлаб олдинроқ аксарияти жиноятчилик авж олгани туфайли вақтинчалик ёпилган 120 та мактаб ҳарбийлар ва жандармерия ходимлари томонидан қўриқлана бошлади. Жиноятчилар ўқитувчилардан уларга йиллик мукофот сифатида берилган пулларни талаб қилган ва бунга бўйсунмаса, ўлдириш билан таҳдид этган.

Бир пайтлар машҳур курорт сифатида донг қозонган Акапулькода йил бошидан бери 800 га яқин қасддан қотиллик қайд қилинган.