Республикачилар партиясидан АҚШ президентлигига номзодини қўйиш учун кураш олиб бораётган миллиардер тадбиркор Дональд Трампнинг қурилиш империяси сайтларидан бирига 11 декабрь, жума куни Anonymous гуруҳи хакерлари ҳужум қилди, дея хабар бермоқда «ТАСС» маҳаллий ОАВларга таяниб.
Ҳужумга миллиардер ўз президентлик кампанияси учун бош қароргоҳ сифатида фойдаланадиган Нью-Йоркдаги Trump Tower осмонўпар биносига тегишли сайт учраган.
Киберҳужумдан аввал Anonymous Twitter’да «Trump Tower сайтига ирқчилик ва нафратга қарши намойиш сифатида ҳужум уюштирилди», — деган хабар қолдирди.
Бир неча кун аввал эса гуруҳ вакиллари интернетга видео жойлаб, унда Трампнинг барча мусулмонларга АҚШга киришни тақиқлаш ҳақидаги таклифига қарши норозилик билдирган эди.