ФИФА расмий сайтида ноябрь ойи учун миллий терма жамоалар рейтинги тақдим этилди. Бу ҳақда Ўзбекистон футбол федерацияси матбуот хизмати хабар бермоқда.
Ўзбекистон миллий терма жамоаси ушбу ой рейтингда ўтган сафаргидан уч поғона пастлади ва ҳозирда 74-ўринга тушди. Айни пайтда Ўзбекистон терма жамоаси ҳисобида 470 очко мавжуд.
Эслатиб ўтамиз, октябрь ойи рейтингида Ўзбекистон 3 поғона кўтарилганди.
Осиё қитъаси терма жамоалари ўртасида ҳамон Ўзбекистон 6-ўринни эгаллаб турибди. Осиё қитъаси терма жамоалари орасида биринчи ўринни Эрон эгаллаб турибди. Форслар шу вақтгача 653 очко тўплаган. Ўзбекистонгача бўлган қолган ўринларни Жанубий Корея, Япония, Австралия ҳамда БАА эгаллаб турибди.
Таъкидлаш керакки, Ўзбекистон терма жамоасининг жаҳон чемпионати—2018 иккинчи саралаш босқичидаги ҳеч бир рақиби рейтингда юзликка кира олмаган.
Жаҳон рейтингини Бельгия бошқариб бормоқда. Аргентина иккинчи, Испания эса учинчи ўринда қайд этилган. Амалдаги жаҳон чемпиони – Германия эса тўртинчи поғонани банд этган.
Изоҳ (0)