Америкалик боксчи Флойд Мейвезер бренди остида маҳсулотлар савдо-сотиқ қилувчи The money team компанияси ходимлари спортчига Ҳиндистондан келтирилган урғочи йўлбарсни совға қилди. Бу ҳақда, айни пайтда Москвада бўлган америкалик ўз Instagram’ида маълум қилди.
«Россиянинг The money team жамоасига меҳмондўстлик ва вақтидан олдин берилган Янги йил совғаси учун миннатдорлик билдираман. Бу икки ойлик йўлбарсга қандай исм қўйиш бўйича таклифларни қабул қиламан», — деб ёзди спортчи.
Аввалроқ Москвага учиб келган Мейвезер 4 декабрь, жума куни «Россия» давлат марказий концерт залида ялпи очиқ машғулот ўтказмоқчи. Машғулот иштирокчилари сони бўйича Гиннеснинг Рекордлар китобига кириши кутилмоқда.