Россия президенти матбуот котиби Дмитрий Песков мамлакат Черногориянинг Шимолий Атлантика альянсига қўшилишига жавобан чора кўришини маълум қилди, деб ёзади «РБК».
Песков сўзларига кўра, Москва аввалроқ НАТОнинг Шарққа қараб кенгайиб бориши тенгликни сақлаб туриш нуқтаи назаридан Россия хавфсизлиги манфаатларини таъминлаш бўйича жавоб ҳаракатларига олиб келмасидан иложи йўқлигини таъкидлаб келган.
Песковнинг аниқлик киритишича, Путин ҳозирча Черногориянинг НАТОга қўшилиши борасида ўз нуқтаи назарини маълум қилганича йўқ.
Нашр эслатишича, аввалроқ Федерация Кенгашининг мудофаа ва хавфсизлик қўмитаси раҳбари Виктор Озёров Черногория НАТОга кирса, Россия у билан ҳамкорликдаги дастурлардан воз кечишини айтган эди.
Эслатиб ўтамиз, 2 декабрь, чоршанба куни НАТО мамлакатлари ташқи ишлар вазирлари Черногорияни Шимолий Атлантика альянсига таклиф қилишни тасдиқлади.
Изоҳ (0)