АҚШ президенти Барак Обама ўзининг ҳафталик мурожаати чоғида мамлакатда суриялик қочоқларни қабул қилишда давом этишга чақирди. Бу ҳақда «Газета.ru» хабар бермоқда.
«‘Мейфлауэр’ кемаси Атлантика океанини кесиб ўтганидан бери орадан 400 йил ўтган бўлса-да, дунё ҳануз ўзлари ва оилалари учун хавфсизроқ, яхшироқ келажакдан бошқа ҳеч нарса керак бўлмаган эркак ва аёлларга тўла. Американи Америка қиладиган жиҳат шундаки, биз уларга бундай имкониятни яратиб берамиз», — дея таъкидлаган Обама.
АҚШ президенти суриялик қочоқларни Шукроналик куни (АҚШда ноябрь ойининг тўртинчи пайшанбасида нишонланадиган байрам) оилаларига қабул қилиш таклифи билдирилган мактубларни йўллаган америкаликларнинг бағрикенглигидан тўлқинланганини маълум қилди.
Сентябрь ойида Барак Обама 2016 йил сентябрига қадар АҚШда 10 мингга яқин суриялик қочоқларни қабул қилиш дастурини эълон қилганди. Давлат департаменти Париждаги терактлар ва ИШИДнинг мамлакатга нисбатан таҳдидларига қарамай, мазкур режалар ўзгармаслигини билдирди.
Изоҳ (0)