Ми-8 русумли вертолёт ҳалокатга учраганлиги муносабати билан Красноярск ўлкасида 27 ноябрь мотам куни деб эълон қилинди. Ушбу ҳудуд губернатори Виктор Толоконский тегишли фармойишга имзо қўйди. Бу ҳақда Meduza хабар беради.
Ғарбий Сибир транспорт прокуратураси тасдиқлаган манбаларга кўра, вертолётнинг ҳалокатга учраши оқибатида 10 киши, шу жумладан, экипаж аъзоларидан уч нафари ҳалок бўлган. Аввалги хабарларда 15 киши қурбон бўлгани ҳақида маълум қилинган эди.
Вертолёт бортида жами 25 киши бўлган. «Барча тирик қолганлар ва жароҳат олганлар Игарка шаҳар шифохонаси реанимациясига жойлаштирилди», ― дея хабар беради прокуратура вакиллари.
«Турухан» авиакомпаниясига тегишли бўлган Ми-8 русумли вертолёт Игарка аэропортидан икки километр узоқликда 25 ноябрь куни ҳалокатга учради. Вертолёт Игарка шаҳридан Ванкор кони ҳудудига йўл олган эди.
Изоҳ (0)