Москванинг Басманний суди сиёсатчи Борис Немцовнинг ўлдирилиши иши бўйича яна уч нафар шахс – Ҳамзат Бахаев, Тамерлан Эскерханов ва Шадид Губашевларни ҳибсда сақлаш муддатини узайтирди. Бу ҳақда суднинг матбуот котиби Анна Фадеева берган маълумотларга асосан «ТАСС» хабар беради.
«Суд терговнинг илтимосномасини қаноатлантириб, Бахаев, Эскерханов ва Губашевларни қамоқда сақлаш муддатини 2016 йил 28 февраль кунига қадар узайтирди», – деди суд вакили.
Суд илгари жиноят иши бўйича икки нафар шахс – Анзор Губашев ва Заур Дадаевни қамоқда сақлаш муддатини 28 февраль кунига қадар узайтирган эди. Иш бўйича тергов ҳаракатларини олиб бориш муддати ҳам шу кунга қадар узайтирилган.
Борис Немцов 2015 йил 27 февраль куни кечқурун Москва шаҳрининг марказида отиб ўлдирилган эди. Тергов жиноятни бевосита содир этганликда Дадаевни гумон қилмоқда ва қолган тўрт нафар шахс эса жиноятни содир этишда алоқадорликда айбланмоқда.
Эслатиб ўтамиз, 2015 йилнинг ноябрь ойида Руслан Муҳиддинов Немцовни ўлдиришни ташкиллаштиришда айбланиб, сиртдан ҳибсга олинганди.
Изоҳ (0)