Тошкентнинг Сергели туманида тирбандлик вақтида темирйўл кесишмасига чиқиб кетган машиналар сабаб ўнлаб вагонлардан иборат поезд состави тўхташга мажбур бўлди. Бу ҳақда Facebook’даги «Водители Ташкента» гуруҳида фотохабар қолдирилган.
«Бугун темирйўл кесишмасида поезд келди, кутиб туриб, бизни ўтказиб юборди. Ҳечқиси йўқ, биз ҳар сафар кутамиз-ку, бир сафар поезд кута қолсин», — деб ҳазил аралаш хабар қолдирган фотосурат муаллифи.
Сурат остида фикр билдирганлардан бири бу вазиятга киноя билан ёндашиб: «Қайсидир ёндош оламда поездлар автомобиллар оқимининг тугашини кутади», — деб фикр билдирган.
Хабар муаллифининг қайд этишича, бу ҳолат юзага келгунига қадар, темирйўл кесишмаси бир марта ёпилиб, икки состав ўтказиб юборилган. «25 дақиқача тирбандликда турдик», — деб ёзади сурат муаллифи.
Мазкур темирйўл кесишмасига яқин жойда истиқомат қилувчи фойдаланувчилар бу каби ҳолатлар аввал ҳам кузатилганини билдириб ўтган.
Изоҳ (0)