Ўзбекистон Миллий кутубхонаси фонди Алишер Навоийнинг француз тилидаги китоблари билан тўлдирилди. Китоблар Алишер Навоийнинг 575 йиллигини нишонлаш арафасида Франция Миллий кутубхонаси томонидан Ўзбекистон Миллий кутубхонасига армуғон этилди. Бу ҳақда кутубхона матбуот хизмати хабар бермоқда.
Orphee La Difference нашриёти томонидан чоп этилган «Gazels et autres poems» китобида Алишер Навоий ғазаллари Ҳамид Исмоилов ва Жан Пьер Балпе томонидан француз тилига таржима қилинган. Китобда таржимонлар Алишер Навоий ҳаёти ва ижоди ҳақидаги қисқача маълумот ва асарлари библиографиясини келтиради. Шунингдек, китобда ғазал, рубоий, қитъа, чистон, муҳаммас, фард, мустаҳзод каби адабий жанрларнинг таърифи ва уларга араб ва француз тилларида намуналар берилган.
Алишер Навоийнинг француз тилидаги яна бир китоби «Gazels» деб номланган бўлиб, Editions Georama нашриётида чоп этилган. Таржимонлар Муродхон Эргашев ва Жан-Жак Гате. Мазкур китобда Алишер Навоий биографияси, ижоди ва лирикаси ҳақида ҳикоя қилинади ҳамда ғазалларининг француз тилидаги таржимаси миниатюралар билан берилган. Миниатюралар мусаввир Жаҳонгир Ашуров томонидан ишланган.
Франциядаги Марказий Осиё бўйича илмий-тадқиқот институти директори Реми Дор томонидан таржима қилинган «L’Enigme du Nom Propre. Muammo» китоби Langues & Mondes нашриётида чоп этилган. Унда таржимон муаммо жанрини таърифлайди. Бу жанрда шоир ўз қаҳрамонларини исмини айтмай туриб характерларини тасвирлайди. Мазкур китобда Реми Дор Алишер Навоийнинг 3 та асаридан 99 та муаммо йиғган. Китобдаги муаммолар 3 тилда: француз, ўзбек ва форс тилларида берилган.
Изоҳ (0)