Россиялик сиёсий арбоблар Туркия—Сурия чегараси яқинида Россиянинг Су-24 самолёти уриб туширилишига муносабат билдирди. Бу ҳақда «РБК» хабар бермоқда.
«Туркиянинг ҳаво кенгликлари мунтазам равишда бузилади, бунга мазкур мамлакатнинг географик жойлашуви сабаб. Туркия муносабатларни кескинлаштириш йўлида онгли равишда қадам босди. Туркия террорчиларга [Suriya prezidentiga qarshi kurash olib borayotganlarga] қурол-яроғ ва ўқ-дори етказиб беради, Сурия ҳукумати кучларини қўллаб-қувватлаётганларга нисбатан душманона кайфиятда», — деди Давлат думасининг халқаро масалалар бўйича қўмитаси раиси биринчи ўринбосари Леонид Калашников.
Россия Давлат думасининг мудофаа ишлари бўйича қўмитаси аъзоси Владимир Комоедовнинг таъкидлашича, Россия самолёти Туркия ҳаво кенгликларига кирмаган. Унинг фикрича, Туркия томони қурол ишлатмасдан, самолётни қўндириб, вазиятга ойдинлик киритиши мақсадга мувофиқ эди. «Туркия ўз ҳаво кенгликларидан баҳам кўрса яхши бўларди, ахир биз уларнинг-да манфаатларини ҳимоя қиляпмиз», — дея қўшимча қилди россиялик депутат.
Давлат думасининг МДҲ бўйича қўмитаси аъзоси Василий Лихачев хулоса чиқаришга шошилмасликка чақирди. «Дастлаб тўлиқ ахборотни тўплаб олайлик. Ўйлашимча, Туркия ва унга қўшни мамлакатлардаги Россия дипломатик хизматларига мазкур ҳодиса юзасидан суриштирув олиб бориш, бунда хатолик юз берганми-йўқми, аниқлаш бўйича кўрсатма берилган», — деди у «РБК»га берган интервьюсида.
Воқеа: Туркия уриб туширган Су-24
Изоҳ (0)