Мунажжимлар башоратига кўра, Telegram’нинг ўзбекистонлик фойдаланувчилари сони камида 3 миллион. 3 МИЛЛИОН, КАРЛ! Мунажжимлар башоратига ишонмаса-да, бошқа соғлом одамлар ҳам шунга ўхшаш рақамларни айтаётгани сабаб, «Дарё» энг муҳим янгиликларни энг қайноқ вақтида Telegram’да улашиш учун янги канал — «Тошқин ‘Дарйў»ни ишга туширди.
Фото: «Дарё»
«Тошқин ‘Дарйў»?! Бундан ҳам баттарроқ бошқа ном йўқмиди?
Бор эди — «Тунги ‘Дарйў». Биз тахминан бир ҳафта давомида канални шу ном остида юритиб, ҳар куни соат 19:00—20:00 оралиғида энг асосий янгиликларни дайжест кўринишида бериб бордик. Ўхшамади — энг муҳим янгиликларни тандирдан узилган вақтида узатган маъқул, деб ҳисобладик.
Сайт, мобил дастур, @DaryoBot бор эди. Яна алоҳида каналнинг нима кераги бор?
Бизнингча, жуда керак. «Дарё» лойиҳаси атрофидаги янгиликлар — мобил дастурнинг ишга туширилиши, ижтимоий тармоқлардаги саҳифалар, Telegram’даги бот — барчасининг асосида сайт туради. «Дарё» хабарларини роҳатланиб ўқиш учун Android ва iOS қурилмаларга мўлжалланган мобил дастурларимиздан зўри йўқ, ҳақиқатан ҳам. Telegram’даги бот Павел Дуровнинг кайфиятига қараб ишлайди, Telegram’даги канал эса беозор ва имконияти кўп — биз унда сайтда чиққан ёки ҳатто чиқишга улгурмаган янгиликларни асабингизга тегмасдан тезда узатишимиз, сиз эса бу янгиликларни дўстларинингизга осонлик билан улашишингиз мумкин.
Хўш, канални томоша қилиш учун нима қилишим керак?
Во, топиб айтдингиз! «Тошқин ‘Дарйў»ни нафақат ўқиш, ҳатто томоша қилиш ҳам мумкин! Бунинг учун Telegram мессенжерининг энг сўнгги версиясида @toshqindaryo’ни қидирасиз, сўнг ‘Жоин’ни босасиз. «Дарё»дан тошиб чиққан ёки энди тошмоқчи бўлган энг қайноқ хабарлар энг биринчи бўлиб сизга етиб боради. Жавоб!
Изоҳ (0)