Ҳиндистонлик таниқли адиба, Букер мукофоти лауреати Арундати Рой диний тоқатсизлик ортиб бораётганига норозилик билдириш учун 1989 йилда энг яхши сценарий учун олган давлат мукофотини қайтариб берди. Бу ҳақда унинг ўзи Indian Express нашридаги мақоласида маълум қилган, дея хабар беради «РИА Новости».
Арундати Рой кейинги пайтда диний озчиликни ташкил этувчилар ва паст табақадагиларга ҳужум, қотилликлар кўпайганини танқид остига олди.
«Бу даҳшатли қотилликлар — чуқур касаллик аломати. Бутун бошли жамиятлар — миллионлаб далит, адиваси, мусулмон ва насронийлар қачон, қаерда ҳужум уюштирилиши мумкинлигидан хавотир ҳамда қўрқувда яшашга мажбур бўлмоқда», — дея таъкидлаган Рой.
Эслатиб ўтамиз, кейинги пайтларда Ҳиндистонда диний адоват ва табақаланиш асосида қотилликлар кўпайган. Олдинроқ Уттар-Прадеш штатида уйида мол гўшти сақлагани гумон қилинган 50 ёшли мусулмон тошбўрон қилиб ўлдирилганди. Харьяна штатида эса паст табақа ҳисобланадиган далитлар кастасига мансуб оила истиқомат қилган уйга ўт қўйилгани оқибатида икки нафар болакай ҳалок бўлган, уларнинг ота-онаси оғир жароҳатланган.
Изоҳ (0)