Hindistonlik taniqli adiba, Buker mukofoti laureati Arundati Roy diniy toqatsizlik ortib borayotganiga norozilik bildirish uchun 1989-yilda eng yaxshi ssenariy uchun olgan davlat mukofotini qaytarib berdi. Bu haqda uning o‘zi Indian Express nashridagi maqolasida ma’lum qilgan, deya xabar beradi “RIA Novosti”.
Arundati Roy keyingi paytda diniy ozchilikni tashkil etuvchilar va past tabaqadagilarga hujum, qotilliklar ko‘payganini tanqid ostiga oldi.
“Bu dahshatli qotilliklar — chuqur kasallik alomati. Butun boshli jamiyatlar — millionlab dalit, adivasi, musulmon va nasroniylar qachon, qayerda hujum uyushtirilishi mumkinligidan xavotir hamda qo‘rquvda yashashga majbur bo‘lmoqda”, — deya ta’kidlagan Roy.
Eslatib o‘tamiz, keyingi paytlarda Hindistonda diniy adovat va tabaqalanish asosida qotilliklar ko‘paygan. Oldinroq Uttar-Pradesh shtatida uyida mol go‘shti saqlagani gumon qilingan 50 yoshli musulmon toshbo‘ron qilib o‘ldirilgandi. Xaryana shtatida esa past tabaqa hisoblanadigan dalitlar kastasiga mansub oila istiqomat qilgan uyga o‘t qo‘yilgani oqibatida ikki nafar bolakay halok bo‘lgan, ularning ota-onasi og‘ir jarohatlangan.
Izoh (0)