Канаданинг Ванкувер шаҳрида истиқомат қилувчи Катя Пинковски, полиция ходимлари ўғрининг қаерда эканлигини автомобилга ўрнатилган GPS орқали аниқлаганларидан сўнг, ўғирланган Tesla’сини муваффақиятли тарзда қайтариб олди. Бу ҳақда, Mashable’га асосланиб, TJ хабар бермоқда.
Пинковки оқшомги концертдан сўнг машина йўқолганини билиб қолди: 29 октябрь, пайшанба куни у дугонаси билан ерости автотураргоҳга қайтаркан, унинг Tesla Model S 85 D’си (бундай Tesla’лар Ванкуверда тахминан 130 минг доллардан сотилади) жойида йўқ эканлигини кўрди. Эвакуация хизмати бу кеча ҳеч қандай Tesla олиб кетилмаганини аёлга маълум қилди.
Шундан сўнг у эрига қўнғироқ қилди, у эса смартфонидаги Tesla Model S мобил дастури ёрдамида Ванкувер яқинидаги Ричмонд бўйлаб соатига 70 километр тезлик билан ҳаракатланаётганини кўрди. Пинковскининг фикрича, ўғри машинани оилавий жуфтлик тасодифан автомобиль ичида қолган захира электрон калит ёрдамида олиб қочган (калитнинг жеваги автомобиль яқинида бўлса, эшикларни автоматик равишда очиб беради).
Аёл 911 га қўнғироқ қилиб, автомобилни кузатиш учун полициячиларга GPS тизимига кириш имконини яратиб берди. «Ишонч билан айтишим мумкинки, диспетчер жуда ҳаяжонланиб кетди. Улар шу вақтгача ҳали ҳеч қачон ўғирланган машинани ростмана кузатиб бориш имконига эга бўлмаганди». Кейинроқ полиция вакиллари бу ҳолат машинанинг қаерда турганини онлайн вақт режимида кўрсатиб турувчи маълумотлардан фойдаланиш бўйича ўзига хос тажриба бўлгани, шунингдек, Канадада илк бор Tesla автомобили ўғирланганини тан олди.
Пинковски бевосита Tesla’га қўнғироқ қилиб, автомобилнинг двигателини масофадан туриб ўчириб қўйишни сўраш ҳақида ҳам ўйлаган. Бундан ташқари, у мобил дастурдан фойдаланиб, автомобиль люкини очиб, гудокни ҳам босиши мумкин эди. Охир-оқибат аёл полициячиларга халал бермасликка қарор қилди, полиция эса 30 октябрга ўтар кечаси тунги соат 1:00да қонунбузарга етиб олиб, уни қўлга олди. 24 ёшли ўғрига нисбатан қиймати 5 минг доллардан ортиқ бўлган мулкни ўғирлаш айблови илгари сурилди, суд ноябрда бўлиб ўтади.
Marketwatch маълумотларига кўра, 2014 йил октябрь ойи ҳолатига кўра, АҚШда тўрт марта Tesla автомобиллари ўғирланган: биттаси 2011 йилда, учтаси 2013 йилда. Сўнгги ҳолатда бу АҚШда сотилган барча Tesla машиналарининг 0,00015 фоизини ташкил этган. Таққослаш учун, бошқа маркадаги машиналарнинг ўғирланиш кўрсаткичи 0,00384 фоизга тенг, яъни, Tesla’нинг кўрсаткичларидан 20 маротаба кўп.
TJ’нинг Moscow Tesla Club’нинг коммуникациялар бўйича директори Игорь Антаровга асосланиб маълум қилишича, ҳозирча Россияда Tesla’нинг ўғирланиши билан боғлиқ бирорта ҳам ҳолат маълум эмас. Унинг сўзларига кўра, Tesla’ни «ўғирлаш амалда бефойда ҳаракат».
«Биринчидан, уни мобил дастур орқали осон кузатиб бориш мумкин. Иккинчидан, Tesla Motors’га қўнғироқ қилиб, автомобилни блок қилиб қўйишни сўраш мумкин. Учинчидан, мазкур автомобиль эҳтиёт қисмларининг иккиламчи бозори йўқ. Охир-оқибат, ўғирланган Tesla’ни қайта сотишнинг амалда имкони йўқ. Уни тармоқдан узиб қўйиш йўли топилганида ҳам, прошивкасини янгилаб бўлмайди, навигация, интернет-радио ишламайди. Бундай Tesla’нинг кимга кераги бор?», — Игорь Антаров.
Изоҳ (0)