Самарқандда кўп қаватли уйлар ҳамда таълим ва тиббиёт муассасаларини локал қозонхоналар билан таъминлаш режалаштирилмоқда. ЎзАнинг ёзишича, бу шаҳар аҳолиси ва ижтимоий соҳа объектларини куз-қиш мавсумида марказлашган ҳолда иссиқ сув ва иссиқлик манбаи билан таъминлашдаги муаммоларни ҳал қилишга ёрдам беради.
Жумладан, шаҳарнинг Сартепа масканидаги бир қатор хусусий уй-жой мулкдорлари ширкатлари томонидан локал қозонхоналар асосида аҳолига иссиқлик манбаи етказиб бериш йўлга қўйилди. Тўртта тўққиз қаватли уйга хизмат кўрсатувчи «Шоҳжаҳон Шермадад» хусусий уй-жой мулкдорлари ширкати жорий йилда банк кредити ҳисобидан локал қозонхона ўрнатди.
«Ўтган мавсумда мазкур қозонхона орқали учта уйга иссиқлик манбаи етказиб берилди. Табиий газ, электр энергияси ва сув сарфини ҳисоб-китоб қилиб кўрдик, аввалги йилларга нисбатан анча арзон тушди. Аҳоли ҳам мамнун», — дейди ширкат раиси Шерзод Омонов. Унинг сўзларига кўра, бу йил тўртинчи уй ҳам мазкур тармоққа уланган ва ҳозирда ширкатда иссиқлик таъминоти билан боғлиқ муаммолар йўқ.
Самарқанд шаҳар ҳокимлигидан олинган маълумотларга кўра, шу пайтга қадар 300 га яқин кўп қаватли уйнинг томи мукаммал ва жорий таъмирланган. 500 дан ортиқ уй-жойнинг ертўласида жорий таъмирлаш, сув қочириш, дезинфекциялаш ишлари олиб борилган.
Шаҳар ҳудудидаги мавзелар ва маҳаллаларнинг 62 минг квадрат метр ҳажмдаги ички йўлларига асфальт ётқизилди. Шунингдек, кўп қаватли уй-жойлар атрофидаги 61 минг 610 квадрат метр ички йўл ва йўлакларга бетон қопламаси ётқизилди.
Қарийб беш километрлик газ тармоғи, 80 километр электр тармоғи мукаммал таъмирланди.
27, 81 ва 112-мактабгача таълим муассасаларининг томи таъмирланди, янги дераза ромлари ўрнатилди. Вилоят қон қуйиш маркази, кўз касалликлари шифохонаси ва 1-шаҳар болалар шифохонасидаги таъмирлаш ишларининг сўнгги босқичи давом этмоқда.
Изоҳ (0)