29 октябрь, пайшанба куни Тошкентда Ўзбекистон шошилинч тиббий ёрдам врачлари ассоциациясининг III-съезди ўз ишини бошлади. Бу ҳақда Ўзбекистон Республикаси Соғлиқни сақлаш вазирлиги матбуот хизмати хабар бермоқда.
Съезд ишида Республика шошилинч тиббий ёрдам илмий маркази ва унинг вилоят филиаллари мутахассислари, олимлар, хорижий давлат вакиллари қатнашмоқда. Анжумандан кўзланган асосий мақсад соҳа олимлари ва мутахассислари интилишларини шошилинч тиббиётнинг устувор муаммоларини ечиш йўналишида бирлаштириб, доимий ва самарали илмий-амалий ҳамкорликни юзага келтиришдан иборат.
Тадбирда ўзбекистонлик профессор-олимлар, хорижлик мутахассислар шошилинч тиббий ёрдам хизматининг аҳоли саломатлигидаги ўрни, илмий фаолиятдаги натижалар, эришилаётган ютуқлар, амалиётга татбиқ этилаётган янги даволаш усуллари каби долзарб мавзуларга бағишланган маърузалар билан иштирок этмоқда.
Маълумотларга кўра, Республика шошилинч тиббий ёрдам илмий маркази ва унинг ҳудудлардаги филиалларида ҳар йили икки миллиондан ортиқ беморга тиббий ёрдам кўрсатилмоқда ва 200 мингдан ортиқ мураккаб жарроҳлик амалиётлари ўтказилмоқда.
Съезд иши 30 октябрь куни Республика шошилинч тиббий ёрдам илмий марказида, сексияларда давом этади.
Изоҳ (0)